0 التسويق المباشر

adsense here

السلام عليكم و رحمة الله وبركاته
الموضوع كله اني لقيت الناس كلها تقريبا مش فاهمة التسويق المباشر او التسويق الشبكي صح وفيه ناس كتير اتنصب عليها من خلال اسم التسويق المباشراو التسويق الشبكي او فيه ناس فاكرينه مندوبي مبيعات والمشكلة انهم مش عاوزين يسمعوا ايه الحقيقة وليهم هم وقعوا مع الشركات دي وليه الشركات دي قفلت بإختصار مش عاوزين نستفيد من اخطأنا وأول متكلم حد ويعرف ان الموضوع موضوع تسويق مباشر يقولك لا شكرا مش عاوز انا اتلدعت قبل كدة او يقولك انتم عاوزين مندوبي مبيعات و لهو عرف الشركة دي بتبيع ايه ولا نظامها ايه ولا اساسا في الاساس هو عرف ايه هو التسويق المباشر علشان يقدر يختار شركة صح .
اسف للمقدمة الطويلة لكن انا حبيت اقول اللي شفته من ناس كتير
وندخل في الموضوع:
1- مقدمة عن التسويق المباشر في العالم:
يا جماعة التسويق المباشر دا مبدأ موجود من زمان جدا من حوالي خمسين سنة تقريبا لكن انتشر جدا في العشر سنين الاخيرة بسبب انتشار الكمبيوتر و اللإنترنت ولأن في التسويق دا بيبقى فيه شبكات خاصة بكل عضو وبتكبر بصورة ضخمة بيصعب معاها تتبعها او حسابها يدويا وطبعا الكمبيوتر حل المشكلة دي . التسويق الشبكي منتشر في دول كتير جدا زي امريكا واليابان وتايوان والصين وغيرها. بس طبعا كل بلد وكل شركة بتاخد الفكرة وتشكلها على حسب مزاجها وكل واحد يختار اللي يناسبه . والاحصائيات العالمية بتقول ان 25% من مليونيرات العالم من اللي بيعملوا في التسويق الشبكي ودا مش كلامي دي احصائيات.
لكن الصين بالتحديد الموضوع دا منتشر فيها بفظاعة علشان كدة الصين بقت الصين اللي كل العالم بيعمل ليها حساب النهاردة.


2- فكرة التسويق المباشر او التسويق الشبكي:

الموضوع كله قائم على دراسات عملها متخصصين في التسويق وتتبعوا سلوك المنتج والمستهلك وقدروا يطلعوا بالنتائج دي ومنها خرجوا بنظام التسويق المباشر دا .
في الاول كان اللي بيحصل ان الشركة بتعمل دعايا كبيرة وضخمة عن منتجاتها في كل مكان ودا كان فعلا بيجيب ارباح ضخمة لكن وفجأة بدأ المعدل دل يقل قوي طبعا الناس مسكتتش قعدوا يدرسوا وجدوا ان مع مرور الوقت حصل وعي عند المستهلك واصبح يدرك ان الممثل ولا الموديل اللي بيعمل الاعلان دا قابض مبلغ علشان يطلع يقول الكلمتين دول لهو جرب المنتج ولا الخدمة ومن هنا فقد الموضوع مصداقيته علشان كدة تراجعت نسبة الارباح.
ودي كانت اول نقطة .
الحاجة التانية لما درسوا سلوك المنتج والمستهلك في السوق وجودوا ان المستهلك هو نفسه بيعمل دعايا للمنتج بدون مبيشعر بس دا مبيجيش من فراغ طب يعني ايه الكلام دا تعالوا ناخد مثال علشان نوضح الامور اكتر::
مفيش مرة حد شاف معاك موبايل أو ساعة أو قميص أو اي حاجة او العكس انت اللي شفت مع حد حاجة وعجبتك وسألته انت جايبها منين او مميزاتها ايه وهو قالك دا انا جايبها من المكان الفولاني .. .....؟؟؟!!!!
اعتقد ان كلنا بنعمل كدة واحنا مش واخدين بالنا احنا كدة بنعمل دعايا للمنتج بدون مبنشعر وفي نفس الوقت مبنخدش اي فلوس من الشركة عمولة على كدة دي اول حاجة الحاجة التانية هو انا ليه رحت اشتريت وانا مطمن لان فيه مصداقية في نقل المعلومة من الشخص دا لانه فعلا جرب الحاجة او المنتج وبالتالي بينقلي خبرته العملية عن المنتج دا مش احنا بنقول " إسأل مجرب ولا تسألش دكتور" طب كويس قوي
- تاني خاصية اساسية من خصائص التسويق المباشر هي الانتشار الشفهي طب بردة يعني ايه الكلام دا تعالوا بردة ناخد مثال صغير عن الكلام دا
فيه اي حد مننا شاف او سمع عن اعلا ن عن محل كشري او فول وطعمية او كباب وكفتة من المحلات المشهورة جدا دلوقت وحتى غير المشهورة احنا ساعات بنلاقي محل في مكان مش معروف في اخر الدنيا بس ابقى الحق بقى صح ...
طب ايه اللي حصل الراجل دا اتعرف ازاي كل اللي حصل ان الراجل دا حاجته كويسة او خدمته كويسة ونحط خط هنا علشان مننساهاش
فواحد راح اكل هناك عجبه طعم الاكل راح قايل لصاحبه وقرايبه وهكذا اسم المحل اتعرف وكبر والراجل معملش اي حاجة ولا دعايا .
ومن هنا تكمن قوة وخطورة الانتشار الشفهي و المصداقية في التسويق
زي ماهو حاصل دلوقت لو فيه مليون واحد قعدوا يقولوا دا التسويق دا جامد واحنا عملنا وكلام كتير وجه 10 بس قالوا احنا اتنصب علينا تلاقي الدنيا كلها عرفت في ثواني .... ياريت نفكر في كل كلمة مش نقراها وخلاص ونحلل الكلام ونفهمه كويس.
انا طبعا عارف اني طولت عليكم بس معلش استحملوني انا بحاول اقدم معلومات وخبرة انا اكتسبتها من السوق ومن تجارب ومن الدنيا ومن ناس كتير جدا ...
وطبعا من الدراسات والملاحظات دي كلها طلع الخبراء بنظام التسويق المباشر .
وكل اللي تم بدل ما المنتج كان بيطلع من المصنع للوكيل وبعدين لتاجر الجملة الرئيسي وبعدين تاجر جملة اصغر...... وهكذا لحد التجزئة منه الى المستهلك
وطبعا لو عرفنا سعر التلكفة الحقيقى الخارج من المصنع والسعر اللي احنا بنشتري بيه هنكتشف انه فيه فرق كبير جدا غالبا بيبقى حوالي 50 الى 60% من السعر النهائي للمستهلك بمعنى لو احنا بنشتري حاجة ب 1 جنيه تكلفتها + ربح المصنع حوالي 40 الى 50 قرش
تخليلوا انتم بقى الفرق .
اللي بيحصل في التسويق المباشر اننا بنبيع المنتج من المصنع للمستهلك مباشرة ( وعلشان كدة مش كل المنتجات تنفع) وبنفس السعر... فيه ناس تستغرب طب ما هو لسة الفرق موجود هقوله اه ماهو من هنا الفلوس اللي بتدفع للناس بتيجي يعني الشركة مبتدفعش حاجة من جيبها والا تبقى بتخسر وتقفل
كل اللي حصل الشركة بتبيع بنفس السعر للمستهلك والفرق بيبقى في الشركة ولما المستهلك دا يقول مجرد يقول يعني يعمل دعايا شفاهية اللي هو واحنا كلنا بنعملها واحنا مش واخدين بالنا لاصحابه ومعارفه على المنتج او الخدمة بعد ما يجربها ويستخدمها ويثق فيها والناس دي تروح الشركة وتشتري المنتج الشركة بتديله حوافز من الفلوس اللي كانت هي اصلا شايلها يعني مش من مكسبها ولا من جيبها ودي حاجة مهمة جدا بردة لان لو الشركة دفعت من جبها تبقى نصابة وهتقفل قريب قوي انشاء الله..
طب ايه اللي بيفرق كل شركة تسويق مباشر عن الاخرى :
في الحقيقة هما حاجتين مهمين جدا :
اولا: المنتج ( بمعنى مدى اهمية المنتج هل هومطلوب ولا لا الناس محتاجاة ليه بديل في السوق ولا لا ولو ليه مدى المنافسة مع السوق الخارجي ايه ولا لا يعني من الاخر هيتباع ولا لا)
ثانيا: نظام توزيع الحوافز بتاع كل شركة ومدى قوته وسرعة صرف الحوافز
وكدة انا تقريبا الحمدلله خلصت شرح التسويق المباشر تقريبا
فاضل حاجة واحدة اننا نتكلم عن الشركات اللي نعرفها واستخدمته ونطبق عليها الكلام دا ونشوف هل هي فعلا كانت مستوفية الشروط دي ولا لا وطبعا لو ما كانتش مستوفياها يبقى محدش يلوم إلا نفسه لانه محاولش يفهم ويعرف الصح فين ::
فمثلا بيزناس الشركة دي من ضمن الشركات اللي سوقت سمعة التسويق المباشر
لو حد فيكم يعرفها الشركة دي كانت بتعمل مواقع انترنت بغض النظر عن باقي تفاصيلها
لو شفنا المنتج اولا سعره كان غالي جدا جدا بالنسبة للموجود في السوق خارج الشركة ومش كل الناس كانت محتاجة لحاجة زي كدة دي اول حاجة تاني حاجة ان نظام توزيع الحوافز كان مش قوي كان بيشترط شيء معين علشان تاخد فلوسك وغالبا الشركات اللي بتعمل كدة بتبقى نصابة عاوزة تحتفظ بالفلوس اكبر فترة ممكنة
طب امال الشركة دي ازاي باعت كل الكم دا الشركة كل اللي عملته انها كانت من اوائل الشركات اللي نزلت مصر واستغلت اسم التسويق المباشر فكانت فرصتها حلوة ان الناس مش فاهمة دي حاجة الحاجة التانية
هي كانت بتسوق الفكرة مش المنتج بمعنى ان الناس كلها تقريبا كانت داخلة علشان الفلوس مش علشان محتاجة المنتج ودا مش صح
طبعا انا ممكن ادخل علشان الفلوس ومكنش محتاج المنتج لكن لازم اكون زكي وافكر كويس هل المنتج دا مطلوب وهيتباع ولا لا لانه لو مش مطلوب يبقى الشركة مش هتبيع يبقى هتقفل واخر حاجة انها كانت بتبيع الهوا ولا اي حاجة موقع ...

لاتوجد تعليقات "التسويق المباشر"

إرسال تعليق